P1.7-B HALAGANG PUSLIT NA SIGARILYO, NASABAT SA CEBU

Nasabat ng Bureau of Customs (BOC), katuwang ang National Bureau of Investigation (NBI) at Bureau of Internal Revenue (BIR), ang tinatayang P1.7 bilyong halaga ng mga pinaniniwalaang puslit na sigarilyo sa isang malawakang operasyon sa Cebu.

Sa isinagawang inspeksyon noong Hunyo 23, sinuri ng mga awtoridad ang kabuuang 24 na container na pinaghihinalaang naglalaman ng kontrabando. Sa bilang na ito, 23 container ang nakumpirmang may kargang mga sigarilyong umano'y ipinasok sa bansa nang walang kaukulang dokumentasyon at hindi nagbayad ng tamang buwis.

Ayon sa Bureau of Customs, bahagi ang operasyon ng pinaigting na kampanya ng pamahalaan laban sa smuggling at iba pang ilegal na kalakalan na nagdudulot ng malaking pagkalugi sa kita ng gobyerno.

Patuloy na isinasailalim sa beripikasyon at inventory ang mga nakumpiskang produkto habang iniimbestigahan ang pinagmulan ng shipment at ang pagkakakilanlan ng mga indibidwal at grupong posibleng nasa likod ng operasyon.

Sinabi ng mga awtoridad na inihahanda na ang pagsasampa ng kaukulang kaso laban sa mga mapatutunayang responsable sa tangkang pagpapasok ng mga kontrabandong sigarilyo sa bansa.

Naniniwala ang mga opisyal na ang matagumpay na pagkakasabat sa shipment ay makatutulong sa pagpigil sa paglaganap ng iligal na produkto sa merkado at sa pagprotekta sa kita ng pamahalaan mula sa mga buwis na dapat sana'y nakokolekta.

Patuloy namang pinaalalahanan ng Bureau of Customs ang mga importer at negosyante na sumunod sa umiiral na mga batas at regulasyon sa pag-aangkat ng mga produkto upang maiwasan ang mabibigat na parusa at pananagutang legal.